ما بتبقاش ناقصة

بعد غزوة احد لما المسلمين عصوا الرسول و انهزموا ربنا نزل قرءان "إن الذين تولوا منكم يوم التقى الجمعان إنما استذلهم الشيطان ببعض ما كسبوا و لقد عفا الله عنهم"......... "فاعف عنهم واستغفر لهم و شاورهم في الأمر"....... و بعد غزوة بدر مع إن المسلمين انتصروا انتصار غير مسبوق ربنا نزل قرءان يعاتب المسلمين على خطأ وقعوا فيه "يسألونك عن الأنفال قل الأنفال لله و الرسول فاتقوا الله و أصلحوا ذات بينكم إن كنتم مؤمنين" الفكرة إن الواحد لما يغلط و نتيجة لكده يفشل بيبقى كفاية عليه مرارة الفشل...بمعنى ان الفشل في حد ذاته هو اكبر عقاب..... ما بتبقاش ناقصة حد يعاتبه و يفضل يأنب فيه الواحد ساعتها اكتر حاجة بيبقى محتاجها إن حد يطبطب عليك و يقولك مش مشكلة و إيه يعني لما تغلط الدنيا ما خربتش يعني بكرة تحول الفشل ده لنجاح  

سواق الريس

الميني باص متكدس بشر و مفيش مكان لواحد يقف على الباب و السواق مصر يقف لكل واحد يشاورله........
احد الركاب: بيقولك سواق الريس و هو سايق بالريس بيقف يحمل اتنين تلاتة من الطريق......
ويقولك ده رزق

و شوفي عهدي كان كام سنة

علي بيدندن بصوت عالي:
و اعتذري  للي هيجي بعدي
و خليه يسامحني اصل انا
اخدت كل حاجة في عهدي
و شوفي عهدي كان كام سنة
 
مرسي: طب خد بالك علشان تامر مرفوع عليه قضية بسبب الاغنية دي
علي : اشمعنى؟
مرسي : علشان فيها معاني جارحة و خادشة للحياء
علي : يا ابني دول فاهمين غلط خالص
ده مش بيكلم حبيبته
و هو اللي بيتكلم عن حبيبنه يقول عن الوقت اللي قضاه معاها عهدي
ايه النوايا اللي زي الزفت دي
...ده بيوجه كلامه لمصر
مرسي : ايه؟؟ مصر!!!؟؟؟؟؟
علي : ايوه مصر...بس على لسان الريس

ولد ولا بنت

التدوينة دي تأكيد  على تدوينة امر واقع
علي: سمعت اخر خبر
مرسي: قول يا فقري
علي: بيقولك خديجة مرات جمال مبارك حامل
مرسي:لا يا راجل..و على كده حامل في ولد ولا بنت
علي: مش عارف الصراحة
مرسي: دي لو طلعت حامل في ولد تبقى كارثة
يبقى احنا كده قدامنا بتاع تمنين سنة ميت سنة قدام في القرف و التخلف اللي احنا عايشين فيه ده

امر واقع

شيخ البلد:الحقنا  يا حضرة العمدة
العمدة: خير اللهم اجعله خير يا شيخ البلد....... مالك
شيخ البلد: الحفرة اللي في اخر البلد كل يوم يقع فيها اتنين تلاتة و عقبال ما حد يلافيه ويوديه المستشفى في اول البلد يكون مات
العمدة: طب اجمعلي الرجالة علشان نشوف حل للمشكلة دي
و بعد عرض المشكلة على الرجالة
الاول: لقيتها يا حضرة العمدة....احنا نوقف واحد جنب الحفرة اول لما حد يقع يلحق يروح يجيبله الاسعاف
شيخ البلد: ما ينفعش...المستشفى بعيدة و عقبال الاسعاف ما تيجي يكون الراجل مات
الثاني: لقيتها يا حضرة العمدة.....احنا نهد المستشفى و نبنيها جنب الحفرة
شيخ البلد: ما ينفعش....الموضوع ده محتاج شهور و ساعتها يكون ناس كتيير ماتت
العمدة: لقيتها يا رجالة.....احنا نردم الحفرة.....و نحفرها جنب المستشفى



*****تعليق: القصة دي فيها اسقاط
الحفرة دي رمز لحسني مبارك
90% من الناس بتتعامل معاه على انه امر واقع
نوقف واحد جنب الحفرة...نبني جنبها مستشفى...نحفرها جنب المستشفى
انما كده  كده  الحفرة  موجودة

واحد شعبان

في الميكروباص
سعيد: هو النهاردة كام رجب؟
مهدي: النهاردة واحد شعبان يا هندسة كل سنة و انت طيب
سعيد: ياااه ده رمضان قرب قوي....و الله الواحد مقصر و الدنيا واخدااه د انا كنت ناوي ابدأ استعد لرمضان قبله بتلات شهور
جمال: سبحان الله ..مش عارف ليه كل سنة يوم واحد شعبان لازم اسمع الكلمتين دول... مش شرط من نفس الشخص

اللعب في الدماغ

فرمت دماغك معايا واسمع اللي هاقولهولك على رواقة :

لما تلاقي واحد سخيف جاي يسألك سؤال سخيف في اخر الشهر " معاك فكة ميت جنيه ؟ ! هايكون ايه احساسك .

سيبك من دي لما تلاقي واحد اسخف - وانت ممعاكشي ثمن موس الحلاقة - ويسألك سؤال بارد " ايه اخبار البورصة ؟

لما تكون انت وعيلتك كلها مكالتوش لحمة من زمن ويجي واحد يسألك اعمل النهارده ايه على الغدا " بوفتيك والا استيك والا اسكلوب

لو حصل كده اعرف انك اكيد اكيد في مصر وطالما انت عايش في مصر هاتلاقي العجائب تلاقي ناس فوق قوي وناس في التراب وعجبي