من زبد التراث

من ساعة انتخابات الشورى و القصة دي دايما بتلح على تفكيري......يا ترى ايه وجه الشبه بين القصة و بين الانتخابات...اشوف تعليقاتكم
كان فيه مرة نمر و ارنب و اسد
و كان النمر كل لما يشوف الارنب يقوله:انت ودانك طويلة ليه...و يروح ضاربه على قفاه
و في يوم الارنب قرر يشتكي للاسد
الاسد للارنب: طبعا النمر غلطان..انا هشوف الموضوع ده
الاسد للنمر: يا عم انا ما بقولكش ما تضربوش..بس علشان ما يبقاش شكلي وحش قدامه و انا ملك الغابة....ابقى اتلككله على اي حاجة..
مثلا..فوله هات تفاحة جاب هالك صفرا قوله ما جبتهاش حمرا ليه.
تاني يوم
النمر للارنب: هات لي تفاحة
الارنب: عاوزها صفرا ولا حمرا
النمر: انا مش ناقص وجع دماغ..انت ودانك طويلة ليه....و راح ضاربه على قفاه

بندق

علي و مرسي راكبين عربية مرسي على طريق السخنة
علي: مش ده الواد بندق ...ما تقف له نخده معانا ..تاخد فيه ثواب
مرسي: اقف له مين يا عم.... انت متعرفش انه مخبر ولا ايه؟؟؟؟
علي: يا عم مخبر مخبر بس بني ادم
مرسي:بني ادم مين يا حج.مش ناقصة بهدلة..يابني المخبرين دول لو مالقوش حد يبلغوا عنه بيبلغوا عن نفسهم

فيلم عربي

كيف تعرف انك فى فيلم عربى؟

عندما يكون البطل مريضا وتقدم لة البطلة حبة الدواء مع كوب ماء

وبعد ان يبتلعها وتسأله البطلة فورا ,, ها عامل اية دلوقتي ؟

المفاجأه انة يرد عليها الحمد لله بقيت احسن...(كدة بالسهولة دي هو واخد حبة البركة ولا ايه

عندما يصل البوليس الي موقع الجريمة دون ان يبلغه احد

( تقريبا المخرج هو اللي بلغ علشان يصور اومال هيصور ايه )

عندما يصاحب مشهد التغرير بالبطلة لقطات الامطار الغزيرة والبرق ...والرعد والشباك الذي ينفتح بقوة علي مصراعيه

( وتلاقي البطلة في الفيلم مصيفه )

عندما تقول البطله للبطل انها حامل فيرد البطل على طول .. اللي في بطنك ده لازم ينزل...( غالبا بيكون يوسف شعبان )

عندما يكون من المستحيل ان تجد الهاتف مشغول

عندما يجلس البطل والبطله في نفس الكازينو بتاع كل فيلم اللي في وش ...ماسبيرو.....ويطلبوا نفس العصير اللي في كل الافلام ( تانج او ميراندا )ويخلص المشهد من غير ما حد يشرب حاجة علشان هيتصور بالمشاريب دى فيلم ..تاني

عندما يصاب البطل بطلق ناري في قلبه وتنزف الدماء من بطنه زي صلصلة الكشري...ويظل يتحدث بطلاقه وتركيز لمدة خمس دقائق....يقوم خلالها بفك لغز الفيلم والاعلان عن القاتل الحقيقي...... او البطل يبقي ابن مين

عندما تسمع صرير احتكاك كاوتش العربيات اللي بطارد بعض وتقريبا بتبقي ....عربيات 128 وماشية حوالي 30 كليو

عندما تتناول الابنة الفطار وهيا واقفة وبتاخد لقم سريعة فتقولها ...الوالدة ما تفطري يابنتي كويس......تقولها لا علشان الحق المحاضرة وتبوسها وتمشي فتنظر الوالدة الي ....الوالد ويبدأن في الدعاء

عندما تغير حرب اكتوبر اخلاق كل المنحرفين الموظف المرتشي والجاره ...اللعوب والبلطجي والمجرم بطبعه

عندما تجد مقر العصابة ملئ بالقش والبراميل الخشبية

منقووووووول

يا خبر اسود

علي:سمعت اخر خبر
مرسي:قول يا سيدي
...علي:الوزيرة النشيطة الهمامة عائشة عبد الهادي فخر الحكومة المصريييييييي
مرسي:انجز يا عم انت
علي:وفرت 120 الف فرصة عمل للمصريين بالسعودية
مرسي: لا و الله...و ما قدمتش ليه يا فالح
علي :اصلهم مش طالبين اي حد..دول عاوزين خدامات للبيوت
مرسي: يا خبر اسود..خدامة و في السعودية..يعني ملك يمين يعني..
يا خبر اسود..هيه حصلت يبيعونا ملك يمين
علي:يا بني الريس باع مصر حتة حتة و لما خلصت بدأ يبيع فينا
مرسي:و الله انا خايف اتطلع متباع من ورايا

مش بعيد الواحد يصحى الصبح يلاقي خبر..تم بيع مواليد 1986 لمستثمر خليجي

الشيخ حسن

الشيخ حسن:داعية شاب بيدعو كل الناس سواء مصلين او مسجلين خطر.
عبد الله(الزنجيري سابقا") :واحد ربنا هداه قريب على يد الشيخ حسن ..و شيخ منصر سابق.
و في يوم راح الشيخ حسن مع عبد الله يكلم الناس هناك(و دول كانوا بيعتبروا عبد الله-الزنجيري-الاب الروحي) في قهوة البلطجية(و دي كانت غرزة خارج نطاق القانون) و هناك
و لسه يدوبك الشيخ حسن بيقول بسم الله الرحمن و مكملش الرحيم، انطلق واحد من اللي قاعدين-بلطجي طبعا: انت ياعم انت ياللي فرحان بدقنك
..هي مش ناقصة صداع..حط لسانك جوه بقك بدل م اجي اقطعهولك
عبد الله اول ما سمع الكلام ده اخدته الحماسة وراح مطلع الموس من تحت لسانه و انقض على الراجل
الشيخ حسن يحاول منعه: يا عم عبد الله اهدا مش كده
عبد الله: استنى انت يا شيخ حسن ..الناس دي ما تجيش غير كده ..انا لازم اقتله
الشيخ حسن:يا عم الحاج كده هتخش النار
عبد الله: مش مشكلة اخش النار في سبيل الله بس اقتله

طلبة حقوق ايام امتحانات(كوميديا)

الأول: ذاكرت مرافعات ؟
الثانى: يا ابنى الموضوع بسيط...هى مرافعة واحده تصلح لكل القضايا
الاول: ازاى يا فالح
الثانى: اسمع يا ريس
سيدى القاضى...شوية المستشارين اللى حواليك دول مش هاينفعوك
وبرة المحكمة كل واحد هايكون لوحده وهانكون راجل لراجل واللى يقدر على التانى
ياريت متلعبش فى عداد عمرك
وبناءاً عليه فالمتهم بريء . وشكراً لعدل سيادتكم
الاول: تخيل انت بقى رد القاضى...................